呀劍萬帥的部落格

我最愛的威尼斯人，酒店房間翻新後首次入住家庭套房，房間大了光猛了，住得特別舒服! 另外到了「冰之歷奇冰雕展覽」，凍住同「功夫熊貓3」及「魔髮精靈」打卡，過咗2日1夜開心之旅

 

 

這次旅程算是哥哥考試前最後一次大玩特玩，我哋來到威尼斯人酒店，先到VIP Lounge休息及Check-in，吃過茶點醫醫肚，我哋就起程到「冰之歷奇冰雕展覽」，知道可以睇見用冰造成的Trolls，芊芊就已經千萬個期待。

 

 

 

 

 

 

 

 

 

進入酒店內，沿路都見到很多「冰之歷奇冰雕展覽」的打卡位

 

 

去到歌劇街又俾我哋撞到佢啦「荒失失奇兵」的角色「朱利安」

 

 

向南翼方向前行直達金光會展F館

 

平時每次上到購物中心都會當失路的我(因為每條街都一樣樣，真係同一天空下)，今次終於知「訂」冇行錯啦！

 

 

真係未出發先興奮，將要見到咁多個夢工場主要角色，而且仲係用冰製成，影相一定超美！

 

  

但最意想不到的，原來場館內的溫度只有零下8度 ~~ 

雖然進場前可以借用大厚雪褸，但係都仲係超凍...我只係着咗短衫短褲！幸好醒目的媽咪已替小朋友預備了所有禦寒衣物，如果凍到佢哋病咗我就大罪喇～

 

展覽分為7個區域，先有為人熟悉的動畫馴龍記；荒失失奇兵；魔法精靈；古魯家族；功夫熊貓及史力加，最後一個區域是功夫熊貓的阿寶設有一系列的主題遊戲、美食、紀念品等攤位

 

 

兩個好積極咁要求我幫佢哋影相，要每一個冰雕都影低，好似唔記得咗自己身處零下8度的地方

 

 

 

 

見佢哋兩個咁鍾意，一於等佢哋乖乖地嗰陣，就Download落嚟俾佢哋睇啦

 

 

 

估唔到冰雕都可以咁靚，成架船都可以做到出嚟

 

 

去到第2區，係佢哋鍾意的「荒失失奇兵」，主題用上了第3集的馬戲團背景

 

 

芊芊好識得配合製造效果，同「荒失失企鵝」影相立即擺番個企鵝Pose

 

 

一眾荒失失角色都喺哂度

 

 

哥哥特別喜愛豹，所以專登要同「Gia」影番張合照

 

萬眾期待的「魔髮精靈Trolls」終於到了! 第3區唔單止係一個展覽，仲有得玩瀡冰梯

 

這區域真的超美，因為「Trolls」呢套動畫本身都充滿好多色彩繽紛的場面

 

  

 

 

 

 

 

其實每次播這套動畫，我都未試過得閒靜靜坐低睇，所以咁多個角色，佢哋兩個仲熟過我

 

 

佢哋等到流哂口水，終於可以試吓瀡冰梯啦，沿旁邊的樓梯行上去，冰梯的上層及下層都有一大隻職員確保安全，唔知佢哋幾耐換一次班，因為留喺度咁耐都真係堅凍

 

 

冰梯速度好高，芊芊細細粒居然佢瀡得最快!!!

 

 

 

 

一支箭咁瀡咗落嚟，睇嚟好好玩咁喎!

 

 

輪到哥哥瀡落嚟啦!

 

 

 

兩個瀡完再瀡，突然唔記得哂自己啱啱仲不停話「好凍! 好凍!」，真係有得玩就乜都得。

連媽咪都要試一試，佢話真係好刺激超爽! 我本來仲以為會玩到成條褲濕哂，可能因為在零下8度環境之下，加埋有大褸墊住，原來又唔係想像中咁樣。

 

 

玩夠瀡夠之後，我哋就穿過冰橋隧道去到第4區的「古魯家族」

 

 

 

動畫的場景係熱帶雨林深山洞穴，同呢度咁凍的環境想比之下真係好大分別，哈哈~ 

 

 

 

去完呢個冰雕展我決定要同小朋友睇埋呢套「古魯家族The Croods」

 

 

鏡頭一轉去到第5區啦! 係我哋最鍾意的功夫熊貓，場景係最新的第3集，這集多咗個大反派「天煞」佢係一隻大牦牛，其實有d似牛魔王

 

 

全員集合，阿寶、悍嬌虎、靈鶴、猴王、俏小龍

 

  

 

 

 

 

哥哥好入戲，妹妹做錯哂手勢...好攪笑

 

 

離開「功夫熊貓3」區之後，遇上兩塊「魔髮精靈」冰雕打卡位，兩個都唔執輸行埋去影一影，不過辛苦媽咪喺後面抱住，哈~~

 

 

 

去到最後一個冰雕展區，就係「史加加」啦

 

 

「費安娜公主」同史力加仔企喺門口歡迎大家

 

  

另外一邊有動畫裡面幾多粉絲的角色，三隻小豬、木偶同埋紅到可以自己有一套動畫的「無敵貓劍俠」長靴貓

 

 

 

 

 

見到咁大隻史力加，全身綠色好似蜜瓜味雪條咁! 仲有唔少得佢好拍檔「驢友」啦!

 

 

 

影埋最後一張相，媽咪同佢哋兩個就急急腳離開了! 

 

出番嚟休息一陣，飲啖熱水保保暖先! 就連我部相機同鏡頭都充滿霧氣

 

 

 

交還大褸後，我哋都留在最後這個「功夫熊貓阿寶」區影影相玩玩攤位遊戲

 

這個「冰之歷奇冰雕展覽」去到暑假前就完啦(展覽至7月9日)，小朋友一考完試就帶佢哋嚟玩吓啦

 

 

 

部份遊戲都係由「功夫熊貓學堂」搬過嚟玩，呢個「智闖敵陣」超好玩，小朋友要穿過紅線陣，但唔可以碰到線上的嚮鈴! (唔係打邊爐嗰D呀)

 

 

呀芊好小心咁一步一步爬過紅線陣，相反哥哥就一跑過去跨唔過觸碰全部鈴叮噹! 如果真係全部機關，你早玩完了，如果每套戲都有個論盡仔，呢個角色哥哥非你莫屬。

 

  

 

 

   

除咗動態遊戲，都有好多靜態活動，呢邊有幾個簡單的工作坊，小朋友可以喺度剪剪紙、填顏色、紙上遊戲，仲有Photo Hunt! 我哋全部都拎一份留番在酒店房或者餐廳先玩

 

 

 

 

 

 

呢度有個神秘裝置，原來埋去睇係播緊「功夫熊貓3」的Trailer

 

 

 

仲有個「百發百中」遊戲，將一個一個大包掉向翡翠僵屍! 

 

個大包好像真，見到即刻有D肚餓!

 

真係好多嘢玩，仲有3部大屏幕可以玩砌圖遊戲

 

 

 

 

見佢哋玩得咁開心，今年暑假一於帶佢哋入戲院睇「功夫熊貓3」啦!

 

 

 

落咗船之後就去冰雕展，終於可以番入嚟酒店房抖一抖，一開門入到房，發現威尼斯人酒店的家庭套房都翻新了，因為牆身周圍都有好多白色位，所以感覺光猛咗好多!

 

 

 

 

 

兩隻嘢一見到床就跳咗上去扮瞓覺

 

 

 

 

 

仲有新Modem，上網連線更快速更穩定

 

 

 

 

安頓好之後，我哋就準備去食Buffet同埋之後去睇「Thriller Live」啦

 

由威尼斯人可以直接步行至巴黎人劇場都唔駛10分鐘，實在太方便了! 今次係我哋第二次睇「Thriller Live」，上次芊芊太攰只係睇咗一半就離場，而且佢都唔係太熟悉MJ的歌

 

 

但係自上次睇完後，哥哥好鍾意唱MJ的歌，所以喺屋企就得閒會聽吓唱吓，今次兩個都做足準備嚟睇，實行要每首都跟住唱!

 

 

 

上次媽咪話好想買番頂MJ帽俾佢哋兩個戴，所以今次佢好豪爽咁買咗兩頂，話可以第日生日會聖誕節都戴得喎，我心諗「當一個人想買一樣嘢的時侯，真係咩理由都噏得出」

好在頂帽原來識著燈(自我安慰貴得有道理)

 

 

 

今次有埋頂帽扮得特別似!! 呀芊呀....你次次都指錯邊架

 

 

係喇! 終於做番啱，識得分左右啦

 

 

哥哥識得拉低頂帽，又幾似喎!

 

 

最興奮呀! 短短1.5小時 剛剛好，非常精采

 

 

今次完咗之後仲可以同幾無主要表演者影相tim ~~

 

 

意猶未盡，兩個繼續邊番房邊跳舞，仲將睇SHOW爆出嚟的皺紙條放入頂帽度扮MJ條公仔麵頭髮，真係笑死我

 

 

行過的人見到佢哋兩個都不停咁笑

 

 

 

 

繼續玩唔停...條假頭髮越玩越長...拖哂地

 

 

 

 

妹妹好想整到好似哥哥咁拖地，哥哥就一於幫佢Set頭

 

 

 

見到佢哋兩口子玩得咁興奮我就最開心 

 

 

 

 

到咗第二朝，我哋都瞓到自然醒，真係冇嘢幸福得過。然後飲過早茶就出發去玩，我哋上了大潭山郊野公園的免費人造草滑草場，由酒店直接搭的士上去只需$30

其實在黑沙公園也有一個真草滑草場，而且仲有得去水上樂園租艇玩划艇同租小單車玩，不過因為有點遠，而且乘公車也有點耐，怕趕唔切番去搭船走人，所以近近哋再到大潭山呢度玩

 

 

入口附近就有個洗手間，非常方便

 

 

沿小路直行入去就會見到滑草場

 

整個景觀都好靚，可以望番落去澳門機場

 

 

咁多字既安全守則點睇呀...

 

 

 

雖然係人造草，但係都一樣可以玩得好刺激，職員定時會灑上水在人造草上，因為烈日當空，咁做可以避免曬燶人造草；又正因為有水的關係，滑落嚟時減少咗磨擦，滑得仲快仲暢順!

 

 

今日即使係假日但人都唔算多

 

 

 

  

滑落去後上番嚟等一兩個又可以再玩過

 

 

 

 

有媽咪上埋去滑即刻快咗超多~ Hehehee

 

 

 

雖然建議4條行車線，但係大家都係亂滑，只要一有位就瀡落嚟，不過人唔多的關係都唔會太危險!

 

 

芊芊自己一個滑得

 

 

哥哥自己滑又得

兩個坐埋一齊滑都仲得，仲好玩!

 

 

 

 

 

 

滑草場對面原來有個兒童遊戲區

 

 

 

難得到此一遊，就俾佢哋兩個喺度放放電

 

 

 

有韆鞦玩芊芊就最開心

 

 

 

  

 

 

 

我想佢哋可以平排俾我影張相，呢兩隻馬騮攪攪陣，專登一前一後唔俾我影到

 

 

 

我唯有靠自己技術搭救

 

 

 

玩完之後我哋就慢慢行番落山，見到咁多飛機小朋友就最興奮! 

 

 

沿路行番落山去到機場大概20分鐘，然後再到機場低層截的士番酒店! 

 

 

 

取回行李就再到VIP Lounge食少少嘢休息吓。跟住發現居然有糭食喎! 因為過兩日就係端午節，感覺特別貼心!

 

 

 

差唔多時間就上專車到碼頭番香港喇，完成今次澳門兩日一夜之旅! 多謝 Venetian Macao

 

 

Photo by CANON 5D Mark IV, Len | EF 24-70mm f2.8L USM | EF 16-35mm f/2.8L III USM

 

 

呀劍評分: 10分