萬眾期待的全球首個大富翁主題館 大富翁夢想世界™ 終於開幕,忠實粉絲當然要來朝聖一下。

 

 


大富翁主題館就位於太平山頂山頂廣場三樓,即以往3D美術館 Trick Eye Museum Hong Kong的原址。

 


大富翁的歷史相信唔駛我多講,大家都係由細玩到大,見過無數咁多款式及不同國家出品的大富翁遊戲。

 


為人熟悉的棋盆上的銀行、水務局、電燈公司、火車站、地契、機會卡等等,都可以在館內完全體驗到。

 

 

一早來到山頂纜車站,原來因工程關係,車站已經搬到附近另一位置。

 


山頂廣場裝修工程完成,並已經重開,商場外貌唔同哂真係好靚呀!

 

 

最急急腳當然就係想快D去大富翁主題館玩下啦!

 

 

搭升降機直達三樓。

 


一出來係天台花園,大家玩過食過之後,到這裏欣賞日落最不錯。

 


在這裏已經可以見到大富翁歡迎你啦~可以同佢先打番張卡,再入佢大宅參觀。

 

 


主題館門口及售票處都係用上鮮紅色設計。

 

 

旁邊亦有POPUP Store精品店及Tuck Shop。

 

 


大家最關心一定係票價,成人$260;小童及長者$220,其實價錢都不算平,不過依家山頂廣場做緊優惠推廣,消費滿$300減$100,所以我哋分三張單去購買門票較為化算,大家都可以參考一下:


成人門票$260+大富翁匙扣$48 = $308 (使用減$100優惠後) $208

另一成人同樣 $208入場

小童則只以第三張單合共$440 (使用減$100優惠後) $340入場


一家人兩大兩小 總共 $756

 

 

 

大富翁主題館主要分作兩部份有7大場景,第一部份先有導賞員帶參加者進入「大富翁先生神秘大宅」 (每15分鐘一節)。完成後就會去到「大富翁城巿」,有好多為人熟悉的場景如火車站、大富翁超級電子銀行、夢想地產、大富翁先生金庫、水務局、監獄。

 

 

我哋先進入大富翁先生神秘大宅的升降機,門一打開大家都即刻「嘩」一聲,因為佢部升降機仲大過我個廳。

 


在大富翁先生家裏,擺放咗好多來自不同國家,不同款式的大富翁遊戲棋盆,以下相中款式價值幾萬蚊喔~

 


牆上都掛滿大富翁先生的相片,原來真係有介紹佢係點樣起家,成為一個富翁。

 

 

 

你睇大富翁先生有幾多珍藏品。

 

 

這副旅行輕便裝大富翁,你又有冇呢?如果有,可能價值連城喔~

 

 

 

 

大富翁先生架超級跑車呀,真係成個人坐到入去,大家可以同超級跑車打卡留念呀!

 

 

 

當然同樣會有專人為大家拍攝,體驗完成後可以到櫃面買回照片。

 

 

完成第一部份的旅程,就去到大富翁城巿,去到呢段就唔會有導賞職員陪同,大家亦可以無限時的玩到直至離開。

 

 

係咪全部都熟口熟面呢~火車站、大富翁超級電子銀行、夢想地產、大富翁先生金庫、水務局、監獄。

 

 

 

就連模擬街道像真度都好高。

 

 

 

每一個位置都係打卡位。

 

 


周圍都好多仔細的設計位置。

 


最吸睛的相信必定係呢個大富翁超級電子銀行,這裡設有五間充滿大富翁鈔票的獨立房間。

 

 

 

 

 

 


大家需於限時內將銀紙執得愈多愈好,不過房內有大風扇會將所有銀紙吹起,增加你執錢的難度。

 

 


但正因為咁樣,就更容易暴露大家貪錢面目猙獰的一面。

 


妹妹執錢執到流哂口水。

 


點解要咁博命執,因為執到的錢真係屬於你㗎~每張面值$10的大富翁鈔票,可變成現金港幣$1使用。

 


聽到職員咁講,就梗係即刻數下大家加埋執到幾多錢,心諗冇一千都幾百啦~

 


不過數完錢之後,先發覺原來兌換得來的面值,只可以作大富翁主題館內小食及禮品店消費,同埋每次最多只可以用3張...即係一張單最多只可以減$6。

 

 

記得這個加油站嗎?

 

 

興奮完又失望完之後(不過真係好開心) 我哋就來到水務局。

 

 


這裏有個水管遊戲配合投射裝置,小朋友要跟大富翁先生合力一起去維修水管。

 

 

 

雖然睇上去小小裝置,但係佢兩個都玩咗好耐。

 

 

水務局旁邊就係夢想地產,大小朋友可以在這裏製作屬於自己的地契。

 

 

 

我哋在屏幕上輸入自己個名,跟住就可以直接打印出來。

 

 

 

再蓋上地契印章,就有屬於自己的一張地契卡。

 

 

地點係隨機㗎~

要睇吓運氣會唔會得到最貴的地段,我哋印咗四張,有一張係地價最高的藍色地段太平山喔~

 

 

然後來到電力公司,不過佢只係一個打卡位,其實同監獄係相連着。

 

 

其實唔知點解,玩大富翁都深印象都係坐監,哈哈~

 

 

所以來到監獄場景就反而特別親切,講出嚟都覺得怪怪的~

 

 

邊有人做監犯做得咁開心。

 

 

哥哥呢個樣係想點?而且係痞在塔上。

 

 

 

 

在旁邊仲有個小遊戲俾大家玩,唔好按中警察呀,會扣分喔~

 

 

館內雖然看上去不太大,但卻玩咗好耐~

 


然後再到火車站4DX影院,戴上3D眼鏡,可以同大富翁先生一齊捉鑽石大盜。

 

 

 

最後去到大富翁先生的金庫(亦係連接出口前的最後一個場景)。

 

 

其實仔細去發掘都可以自己設計配合場景影靚相!

 

 

有專業的攝影服務提供,不過我自己都影得咁靚,就冇再嘥錢買相了(自己話)~

 

 

 

當然都可以拜託專業攝影師哥哥幫自己影相啦!

 

 

其實每個場景都做得好仔細好靚!金庫、夾萬、金條、金幣等...

 

 

 

 

在金庫裏面都有小遊戲玩。

 

 

 

真係唔捨得咁快走,一於再同哥哥芊芊影多幾張相,扮吓有錢人先~

 

 

臨離開前,估唔到都仲有最後一個場景,就係好似好多贏獎金贏獎品的遊戲節目一樣~

 

 

 

可以憑自己張入場門票,Doo個QRcode,就可以玩最後一個幸運棋盤遊戲贏獎品。

 

 

獎品當然包括所有贊助商提供的現金券或者禮品。

 

 

 

我哋每人都中咗獎呀!芊芊中咗奇華禮券,媽咪就中咗架模型車,我哋都中到旅遊禮券呀~

 

 

 

 

至於哥哥中咗咩呢?佢中咗監獄個格,原來係飲食禮券,可以到外面Tuck Shop換嘢食嘢飲。

 

 

 

 

如果大家在最後幸運棋盤中到機會個格,就可獲得一次機會去按下密碼,如果中咗~有機會贏到價值$40萬獎品㗎!

 

 

 

 

 

Photo & Video by Sony A7III FE 16-35mm F/2.8 + iPhone11 Pro


想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

 

地址

香港山頂道118號山頂廣場3樓301號舖


開放時間/營業時間

上午10:00 – 下午10:00


交通指南

1. 山頂纜車於中環花園道纜車站乘山頂纜車

2. 巴士於中環五號碼頭或港鐵香港站D出口的中環交易廣場巴士總站,乘搭新巴15號巴士。

3. 小巴於港鐵香港站E出口的公共運輸交匯處,乘搭1號綠色小巴。

 

網址

https://www.monopolydreams.com/

 

(以上資料更新至文章當日)

 

 

 

Facebook專頁: 呀劍萬帥 kimfamilytravel

 

Blog網誌 : www.kimfamilytravel.com

 

                 

arrow
arrow

    呀劍萬帥 發表在 痞客邦 留言(0) 人氣()