呀劍萬帥的部落格

聖誕話咁快又到，各大商場都開始唔同嘅慶祝節目，今次荃新天地Citywalk就搵嚟大人小朋友都熟悉，每個屋企都總有一盒的Crayola，同大家過一個色彩繽紛嘅聖誕節!

一開始就要去玩呢個有不同主題的聖誕小屋，包括「幼兒聖誕屋」、「玩具油樂園」及「閃閃聖誕夢」可以話俾不同年紀朋友一個小天地盡情塗鴉 (但係其實大人細路哥鍾意去邊度畫又得)

另外今次最矚目的一個打卡位就係呢個全港最大嘅「彩虹蠟筆牆」，係由超過3萬枝22種顏色蠟筆砌成。

每人入到嚟都獲派發一筒蠟筆同埋一個「聖誕願望球」

一除低對鞋就開始準備跑入去亂畫一通

當然自己都可以去「彩虹蠟筆牆」揀自己喜愛嘅蠟筆顏色啦

見到咁多顏色，未開始畫已經好開心

我家公子公主都真係識揀，一入場就SKIP咗呢個小朋友塗鴉場

直接就跑咗入去更大的「玩具油樂園」，兩個一拎起支蠟筆就開始不停周圍畫

香港一般家庭，如果小朋友畫花咗度牆，一定俾呀媽鬧死

所以其實香港呢個地方都幾限制咗小朋友的創意天份，不過都係身不由己，所有爸爸媽媽又何嘗唔係想有間大D嘅屋，可以有間房俾小朋友任意塗鴉

難得今日可以在「荃新天地」呢度盡情塗鴉，點會咁快就玩完!!!

連媽咪都畫埋一份，仲走過嚟同我講「呢個位係我畫架! 」咩童真都返哂嚟! 所以大家千祈唔好翹埋對手睇小朋友畫，自己都要落埋手同佢一齊瘋狂咁畫! 

佢哋兩個好似想將成架火車油完先肯走

連隔離隻啤都唔放過，一於畫個花面貓! 無論牆身，地下，周圍都可以係咁畫!!! 真係爽

不過後尾知道原來每一節都限時，同埋職員哥哥姐姐會定時清潔，留俾下一場小朋友塗鴉，佢哋終於肯停落嚟!

臨離開「玩具油樂園」前都同黃色小蠟筆Dandelion(Dan.D)都打番張卡，聽講佢今年3月宣佈咗退休...(我都想囉，同佢影過相可能都會感染到少少氣場)

仲記唔記得頭先一開始嘅時侯每人都會有派一粒金或銀色「聖誕願望球」，就會用嚟寫上心願，然後過隔離的「閃閃聖誕夢」，將個聖誕波掛上去

呢邊仲有一個超巨型大「聖誕願望球」可以任意俾小朋友塗鴉一番

兩個都秘秘密密咁許咗個願，唔知佢哋寫咩...

然後佢哋就將願望掛上去，希望你哋願望成真啦! 

離開3間主題聖誕小屋，原來出番去「彩虹蠟筆牆」的另一邊，係一個打卡位，大家除咗可以同巨型「彩虹蠟筆牆」影相，仲有支巨型蠟筆可以俾你抬起影相，不過要小心附近嘅人呀，俾支蠟筆撞親都幾痛架! 哈哈~

其實職員會定時定侯將最前的留言板擦去，再俾新加入的顧客再畫，所以貼上去之後就即刻打張咭先走呀

喺「聖誕童畫」主題圓柱下，有好多聖誕圖畫俾顧客隨便塗畫，估唔到有咁多大人都靜靜的好有耐性咁企喺度畫

真係估唔到原來Crayola出過咁多款產品

穿過POPUP Store，有個特色聖誕工作坊叫「Crayola創意實驗室」有導師教大家做各種唔同藝術作品，不過要睇番工作坊舉行時間表，唔係時時有! (可參考文末資料)

但係呢邊個「數碼魔法站」就唔駛睇時間喇，隨時都可以過去玩

只要拎張專用畫紙(全部都係至愛Elsa同Avengers至愛角色)，填好顏色再用iPad掃一掃，用AR技術，角色即刻會走咗入iPad，仲可以開Airdrop秒變咗入你電話裡面(當然iPhone先得啦，email當然都OK!) 

做呀妹真好，有咩唔識都可以望吓哥哥點做先!

呀妹「我明啦!...」

完成咗之後梗係要同自己作品影番張相

荃新天地二期嗰邊仲有「奇想畫廊」有好多幅留白作品，可以俾顧客用蠟筆畫上自己的作品，變咗好似自己畫展咁! 有時間可以過埋去睇吓

留意今星期六12月2日，流動藝術聖誕車會遊走香港，大家可以合法「畫花架車」啦!

聖誕車鬧市七彩巡「油」

日期 

12月2日 (星期六) 

時間 

中午12時 至 下午4時 

地點 

荃灣、尖沙咀、銅鑼灣 

活動詳情 

流動藝術聖誕車將於12月2日遊走香港，參加者除可盡情畫車外，更可得Bless冷壓果汁1支。活動完成後聖誕車巡迴穿梭香港各區，展出市民集體創作作品，讓更多市民欣賞。

Photo by CANON 5D Mark IV, Len | EF 24-70mm f/2.8L USM