話說早在半年前已得知有這個港鐵展廊,不過一直都預約唔到,因為只有星期六日開放,而且仲要你個月前就要上網預約,最後終於七月可以嚟到參觀...哈~

 

 

 

港鐵展廊位於九龍站,出閘後向E出口方向,即機場快線那邊,再沿扶手電梯落一層就係啦

 

 

 

一落到嚟就會見到呢個「港鐵車票回憶牆」,導賞團未開始我哋就喺度搵下有冇我細個嘅童年回憶先(其實遠睇仲會見到 "MTR Gallery"個字樣)

 


導賞員講解回憶牆嘅時侯,特別介紹牆上面兩張車飛,一張係職員用的 "Test Ticket"

 

 

另一張係地鐵當年通車的紀念車票(真係對呢張飛冇咩印象...死唔認老!)

 

 

仲有個3D立體拍照區,不過呢架機場快線變飛機,真係幾奇怪!

 

 

行到過嚟呢邊,後尾先知道係個後門,完成整個導賞參觀後就會由呢度離開

 


淨係呢個充滿零件嘅牆,見到都覺得頭暈

 

 


入到嚟「港鐵列車模型」展區,呢度展示住過往咁多年的唔同款式「地下鐵路」至今日我哋叫的「港鐵」



每架模型都真係好靚同造得好逼真

 

 

 

 


哥哥每架都想我影低,話番屋企可以俾佢照住畫

 



另一邊係「港鐵列車知多少」,先有架好QQ的迷你港鐵

 

 

有好多有趣問題我從來冇諗過的,呢度都一一解答哂!

 

而且仲有幾個多媒體互動遊戲同埋影片觀賞區等

 

 

仲有個大屏幕播放短片講述港鐵的以往與現在,以至未來的鐵路2.0。

 


但係呢兩個人就當個投射用嚟玩手影

 


仲有個比例一比一的模擬列車,佢哋兩個企埋去真係變得好細粒

 


行樓梯上去可以見到一個同真實一模一樣嘅港鐵車廂

 

 

車廂分左(1979-98)右(1998-Present)兩邊

 

 

新嘅呢邊我哋依家去搭港鐵都影得到

 


但係呢邊實在令人懷念呀!仲記得呢款舊式長櫈嗎?

 


仲有圓波波扶手

 


原來以前得觀塘至中環一條線架咋

 

 

 


我記得呢個「嚴禁飲食」貼紙,哈哈~

 

 

 

呢款就真係未見過,原來屈張車飛都會罰錢 ^。^

 


車尾有個「虛擬體驗區」又有VR玩,不過佢哋兩個玩到頭暈暈

 

 

 

估唔到車頭仲有得打機,做港鐵車長駕駛鐵路,不過一時三刻都唔係好知點樣玩個遊戲,每次到站都飛站...(個個坐喺度玩嘅朋友都係咁)

 

 


最後有兩個「影像區」,一個紀錄番呢幾十年曾經用過鐵路拍攝的電影

 


呢兩套我真係冇可能唔記得,「下一站天后」同埋「富貴再逼人」

 

 

 

仲有呢個展示港鐵職員制服的展區,如果有得著埋上身影相就更 Perfect

 


最後行過呢條斜路離開展廊,再見到D用港鐵做 Pattern 的畫同機件組裝圖

 

 

 


相信呢個係甚麼重要的機件,唔知係咪佢令到港鐵成日故障呢^.^ 哈哈~

 

 

 

Photo by CANON 5D Mark IV, Len | EF 24-70mm f/2.8L USM

 

想跟我去體驗其他活動,快D報名親子團,同埋留意專頁公佈詳情啦!

 

 

 

呀劍評分: 7

 

呀劍評語: 唔知幾時再有機會,所以遲到好過冇到,都要嚟欣常一下咁大咁靚既變型金剛

 

港鐵展廊》

設於九龍站的港鐵展廊,是港鐵的時光隧道,參觀人士可在這裡了解港鐵的以往與現在,以至未來的鐵路2.0。此展廊適合不同年齡的人士參觀,內有一列一比一的模擬列車、多項多媒體互動遊戲及影片觀賞區等。展廊會透過形形式式的展品,拓展與社區的連繫,讓大家一同回顧港鐵的發展,增加對港鐵的認識。展覽內容更會不定期地更新,讓參觀者可從多角度了解車務的運作,以至港鐵的未來發展路向。

 

 

地點

九龍站機場快綫1號月台 (往機場及博覽館站方向) 

 

查詢熱線

2881 8888

 

(以上資料更新至文章當日)

 

 

Facebook專頁: 呀劍萬帥 kimfamilytravel

 

Blog網誌 : kimfamilytravel.blogspot.hk

 

文章標籤
創作者介紹
創作者 呀劍萬帥 的頭像
呀劍萬帥

呀劍萬帥的部落格

呀劍萬帥 發表在 痞客邦 留言(0) 人氣()