母親節最驚就係出去同人逼,所以機智的我一早就在中菜軒訂好枱,同媽咪小朋友一齊慶祝個Hello Kitty母親節

 

 

就算Book到枱都驚會太多人,所以專登訂早少少,6:30就開始食! 食之前梗係要打打卡先

 

 

雖然全家都唔係Hello Kitty忠粉,但唔知點解每個屋企都總會有幾隻或幾款Hello Kitty的周邊產品,所以小朋友嚟到食都係一樣會咁高興!

 

 


我哋Order咗呢個母親節4人餐,剩係睇個餐牌已經覺得乜都抵番哂! 真係超豐富

 


一年前都喺度飲過早茶,同樣喺呢個打卡位影過一張相,兩個都長大了不小,突然想如果每年都嚟打打卡都幾攪笑

 

 

(攝於13/1/2016)

 


等咗只係一陣間就已經先來一客冬瓜盅! 先唔講個湯,我同媽咪都研究咗好耐究竟個Hello Kitty圖案係點做? 因為好仔細超精緻 (當個湯飲到咁上下時侯,因為冇咗冬瓜肉,個圖案半明仲好似發光咁架!)

 

   

個湯好足料,好多金華火腿,而且好似飲極都飲唔哂,我哋最後食完成餐飯都飲唔哂,仲要打包走(都仲滿喎)!

 


芊芊不停讚碗冬瓜盅好好飲!

 


個母親節餐打頭炮當然係Hello Kitty蝦餃皇啦!

 


同上次一樣個Hello Kitty Face仲係做得咁靚! 同上次一樣都係擺到最後先捨得食有貓樣呢粒蝦餃

 

 

 

 

「窩心筍思」當然為母親節而設啦!!! 媽媽夠窩心喇卦

 

 


跟餐仲有兩款湯 1)杏汁白肺湯 同埋 2)Hello Kitty 紐西蘭青口湯,「肺」簡直係我至愛! 所以特別喜歡呢碗湯

 

 

 

傳統菜式「賽螃蟹」加上蟹籽顏色特別靚,蟹籽亦係芊芊近期至愛食的

 


Hello Kitty 蝴蝶拼盤 (椒鹽豆腐+雞軟骨) 唔會太鹹啱啱好,豆腐外脆內軟仲熱辣辣正!

 

 

 


跟餐有兩款石鍋飯可供選擇,我哋就揀咗牛肉(另一款則海鮮),個名仲好勁叫「Hello Kitty 擁抱窩心飯」,但係千祈唔好真係去擁抱個石鍋....哈哈~


個飯上面仲有一塊印有母親節專屬圖案的蝦片

 


咁齊餸梗係要影番張相呃吓Like先! (心諗都唔知食唔食得哂)

 


佢哋兩個就一定搶住要食呢塊蝦片啦

 

 


撈起個石鍋飯! Yeah 件件牛肉都係鮮肉,仲要係厚切嗰隻,唔係好似打邊爐嗰款薄黐黐...

 


都已經食到半飽,仲有碟當紅炸子雞! 今日母親節,就一定係媽咪最紅啦,我請妳食哂佢! 不過真係唔油好乾身,皮就一定脆到索索聲,肉身唔乾好滑漏!

 


正所謂食甜品係用第二個胃,跟餐的芒果布甸,仲有芝士撻配雪糕,唔知點解食極都唔會飽!

 

 


上次都食過呢款芒果布甸,今次睇真D原來佢對眼係暈舵舵

 


都唔知佢係專登定唔覺意,點解食粒朱古力都可以食到咁既樣!

 

  

芝士撻配雪糕,原來球雪糕係芒果雪糕嚟架,簡直開心到哥哥跳起! (話時話隻碟個形狀好似Batman ^.^)

 


哥哥有芒果布甸已經唔得閒理其他嘢,所以話個撻唔食俾哂呢兩個靚女清哂! 咁禾呢....

 

 

最後跟餐仲有兩支汽水,但係頭先飲湯真係飲到成肚水,呢兩支就拎番屋企慢慢嘆!

 

   

 

Photo by CANON 5D Mark IV, Len | EF 35mm f/1.4L USM

 

呀劍評分: 10分

 

呀劍評語: 食過呢餐母親節大餐又令我對中菜軒加分,因為佢唔係只係得個睇字,真係都好好味,尤其最後甜品個芝士撻,食到媽咪舔舔脷! 食物質素真係拍得住大酒店

 

 

HELLO KITTY 中菜軒 簡介

全球首間Hello Kitty中菜軒登錄香港,秉承中菜傳統味道及健康飲食文化,擁有近40年港日粵菜經驗的名廚團隊四出尋找自然五色食材,以天然、健康及有機原則每天製作出色彩繽紛、匠心獨韻的Hello Kitty粵式點心及精緻小菜,集合色、香、味、健、美的卡通主題美食體驗,由Hello Kitty帶動健美中菜的最新風潮!


地址

佐敦廣東道332-338號利來洋樓A至C地舖

 

開放時間

星期一至星期五11:00am-10:00pm

星期六、日10:00am-10:00pm

 

交通

1. 港鐵佐敦站C2出口,步行約5分鐘

2. 港鐵柯士甸站B2出口,步行約7分鐘

 

訂座電話

8202 8203

 

網址

http://www.hellokittychinesecuisine.com.hk/

 

(以上資料更新至文章當日)

 

 

Facebook專頁: 呀劍萬帥 kimfamilytravel

 

Blog網誌 : kimfamilytravel.blogspot.hk

 

文章標籤
創作者介紹
創作者 呀劍萬帥 的頭像
呀劍萬帥

呀劍萬帥的部落格

呀劍萬帥 發表在 痞客邦 留言(0) 人氣()